أحلام كل طالب

بسـم الله مــول المـنـة *** والصلاة على صاحب السنـة


محمـد بـذكـرو نتهـنـى *** جابلنـا الرسالـة والـديـن


كنت إنسان عنـدي طمـوح *** الطا ما جيسكـول ومفتـوح


نحب ديمـا نبلـغ الصـروح *** ونـكــون مالـبـارزيـن


وعلـيـه درت فالـخـطـة *** نوّلـي قيـادة كـادر ديطـا


ويــذا ربــي زاد عـطـا *** نترشح رئيـس للجزائرييـن


وجـاو هـذوك الربـع ايّـام *** وخـوكـم زيّــر لـحـزام


بـدلـت كــل السيسـتـام *** ليلـي ونهـاري متماثلـيـن


ظهرت النتيجة وخرج اسمي *** والفرحة دوّات في جسمـس


الـدار ذبحـولـي عجـمـي *** وكانـوا بـيـا فرحانـيـن


وأول شـي فـي عقليـتـي *** شوق كبيـر للونيفارسيتـي


اللي عقبـو عليهـا خاوتـي *** وكانـو منهـا متخرجـيـن


والنهار اللّول نتاع التسجيلات *** الغاشي تقول الأمة كامل جات


والسخانة ترونت سات (37) *** وحنـا فالشمـس مقابلـيـن


خيّرت فرع العلوم السياسيـة *** باش يخدملـي ذيـك الغايـة


اللي ذكرتها قبيـل فالبدايـة *** ياخـي راكـم متفكريـن؟؟؟









بدات الـدروس يـا سيـدي *** وقلت نخرج كل مـا عنـدي


مـن طاقـة لكـن يـا ودّي *** الإمكانـات كانـو غايبيـن


كـي تخـل لـذاك المـدرج *** نص يقرا والباقـي يتفـرج


قلولنا اصبروا راه ربي يفرّج *** والكراسـى يكونـو كافييـن


الشمبرا نتاع زوج فيها ربعة *** والريستو أنتاردي الشبعـة


وكل يوم مظاهرات فالجامعة *** بـالـظـروف مـنـدديـن


ويذا ركبت في ذاك الكـوس *** تقـول كريمينـال محبـوس


عالكـرامـة غـيـر دوس *** ومـا تكـون مالطماعـيـن


وبـــالاك الـغـيـابـات *** خصوصـا فالتيدييـات (td)


وياويح اللي بقاولو لي دات *** يتبعوه حتى عشـر سنيـن









هنـا عـاودت شفـت لحالـي *** وقلـت عـيـش يالـزوالـي


القناعة الكنز اللي مـا يفنالـي *** والشي صعيـب يـا سامعيـن


لكن ماعليـش طريـق المجـد *** أَوْلُـو ديمـا صبـر وجـلـد


مــا نغـتـم مــا نتنـهـد *** نـكــون مالإيجـابـيـيـن


وهـذي سـنـة رب العـبـاد *** ماشـي قـال مولـود حـداد


الدنيا تعب وتضحيـة وجهـاد *** النفس هنا وكاين جهاد ففلسطين


وبالمنـاسـبـة رح نغـتـنـم *** هـاذ الفرصـة بـاش نترحـم


عالشيخ يسين وكل مـن قـدم *** حياتـو فـداء لهـاذ الـديـن


هـذاك هـو خيـر الأمثـلـة *** اللـي تحبسـلـك المخيـلـة


رجـل قعيـد قـاد مرحـلـة *** ديـال الـدفـاع والتمكـيـن


قال مالازمش يتحول المسـار *** إمـا شـهـادة أو انتـصـار


القضية ماهيش في مجرد أشبار *** يقيـسـوهـا الجغرافـيـيـن


القضيـة قضـيـة صـمـود *** فـي وجـه الظلمـة اليهـود


ما رايحينش نغلبوهم إذا الجهود *** تفرقـت وكـنـا متنازعـيـن


وحـنـا يلزمـنـا الـوفــاء *** لـهـاذ الـنـاس الأتـقـيـاء


ورثــــة الأنـبــيــاء *** للهم نـكـونـوا حامـلـيـن









الأم اللـي ترضـع *** الشبل اللـي يطلـع


فـي قلبـة تطـبـع *** أفكار أحمد ياسيـن


التلميذ اللـي يقـرا *** لازم يحقق النصـرة


بالفعل مو بالهـدرة *** لأفكار أحمد ياسيـن


المعلم اللي يـدرّس *** يواصل مـا يحبـس


حتى فالنشء يتنغرس *** أفكار أحمد ياسيـن


الطالـب فالجامعـة *** واجب عليه يسعـى


باش الناس تتوعـى *** بأفكار أحمد ياسيـن


الشاعر اللي يشعـر *** لازم يدفـع ويؤثـر


فالجمهور الحاضـر *** بأفكار أحمد ياسيـن









فالأخيـر كلمـة نقولـهـا *** فلسطيـن ياربـي احفظهـا


برعايتـك وحنـا فـداهـا *** ومانـاش فيهـا مفرطيـن


بصح اسمعوني ياناس لملاح *** اللي خان حي على الفـلاح


يخون حي علـى الكفـاح *** والصـلاة عمـود الـديـن

برافو ....برافو ....برافو ...والله غير عندك الحق في كل كلمة قلتها